كان يا مكان
كتبهاالفنان الساخر أبو أميمة ، في 21 أغسطس 2008 الساعة: 16:30 م
كان يا مكان
ساعة الوقت حنات عقاربها
ورشت بما الزهر عتبة الزمان
علقت قصبة و خرقة بيضة
زينتها بعراش النعناع
شبة و حرمل السعد يكمل
و الكف يشد الضربة ميزان
عرضت على فلان وفلان
التايك ومول الحايك
المركانتي الزوين
و الغني مول لوزين
بوسلهام مول السلهام
و الجيلالي مول لفدان
حميدة لقرع 
لابس كبوطو الجديد
واقف فالباب يسحلل و يرحب
يشرق ويغرب
ريوكو طايحين من ريحة الطياب
جات حليمة
ذهبها فيدها
تنين و تعرج
بدفينة و قفطان
الشربيل المطروز
الحنة منقوشة
تنهج و تطحر
خمسة و خميس
على الحنزازة و عين العديان
لالة فخيتة مراة الباشا الجديد
نزلت من الحديد
دايرين بها خدامة و عبيد
المخازني مكردف
كردف معاه حتى احميدة
زادو ليها شان
بنخوتها سعيدة
كلها و فين جاتو
كلها و باش محرف
كلها و كيف مسيف
و حميدة القرع
فالباب كيكمع
دوخاتو ريحة الطياب
ضرباتو للراس
يكمع ما ينعس
قهروه ولاد” ……”
القراب و البعاد
يدو ما تحبس
على وجه مهلوك
كتنش الدبان
حميدة القرع
يشوف ما يسمع
يشم ما يشبع
يتسنى لعرس يسالي
يتسناهم يمشيو
فلان و فلان
التيك و مول الحايك
المركانتي الزوين
و الغني مول الوزين
بوسلهام مول السلهام
و الجيلالي مول الفدان
حليمة العوجة
و مراة الباشا الجديد
المخازني المكردف هو و حميدة
الخدامة و العبيد
و زيد وزيد
ديك الساعة يغنم العشا فالأمان
العضومة كثار
واخة ما فيهمش اللحم
فيهم البنة
حميدة يتسنى
يشم و يتمنى
هذا الشي يسالي
الموسيقى لداخل
كتصم الأذان
و حميدة يغالب النعاس
خايف من شي ناس
الا داتو نومة
يطيرو لو بالعضومة البنان
لكن العرس ما سالا
هذي البسالة
شحال قد احميدة يغالب النعاس
شحال قدو مسكين
يكزز السنان
قاوم و قاوم
همع و كمع
طلق نيفو للشمان
شم ما شبع
و انهزم مسكين
وجبد عليها بنعسة
يلعن الطالع و الهابط
يلعن الباكي و الناشط
يلعنها و خا بنينة ريحة الطياب
يلعن حليمة العوجة
و مراة الباشا الجديد
يلعن فلان و فلان
التايك و مول الحايك
المركانتي الزوين
الغني مول الوزين
بوسلهام مول السلهام
و الجيلالي مول الفدان
يلعن الساعة و عقاربها المسمومة
يلعن معاها حتي الزمان
نعس حميدة و فحلمو شاف
راسو عريس
دايرين بيه كلهم
الطاهر رجاف الله
طالب معاشو
قدور الزغبي
هشوم المهموم
علي ديال الله
سويرتي مولانا
مول الزريعة
مول النعناع
مول الكروسة
مول الزعبول
فاطنة الصبانة
و مولات البغرير
حدو السيرور
و عبيدة الفقير
مول النخالة
و حتى مول جبان
و كدام الباب
حميدة لقرع
فحلمو شاف
يكمعو و يهمعو
وينشو الذبان
حليمة لعرجة
و مرات لباشا الجديد
فلان و فلان
التايك و مول لحايك
المركانتي الزوين
الغني مول الوزين
بوسلهام مول السلهام
والجيلالي مول لفدان
ساعة لوقت المسمومة عقاربها
وكان يا مكان
شرقت الشمس
ضرباتو الفيقة
حميدة مسكين
تقطعات الريحة
تقطعات الرجل
كلشي مشى بحالو
وحميدة حصل
العضوما طارو
و مشات البنة
عيا يتسنى
حميدة مسكين
ما هو بنعاس مكود
ما هو بعضوما بنان
مانالو من الساعة غيرسم عقاربها
ما نفعو تسحليلو لفلان و فلان
ما نفعو تكرديفتو مع المخازني لمراة الباشا الجديد
ما نفعو يبارك لحليمة العوجة و يعيد
ما نفعو الكبوط لي لابس جديد
ما نفعو يهمع و يكمع
ما نفعاتو شقيقة الراس من ريحة الطياب
ما نفعو عسانو هو و الذبان كدام الباب
الليل و ما طال حميدة مسكين
قاهرو الزمان
حميدة مسكين ،كان يا ماكان
ـــــــــــــــــــــــــــــــــــــــــــــــــــــــــ
التصنيفات : زجل | السمات:زجل
أرسل الإدراج | دوّن الإدراج
